Die HERLAAIVERENIGING van SUID-AFRIKA

Gedurende 1997 het ‘n paar herlaai entoesiaste in Pretoria op inisiatief van Org Hamman in Pretoria bymekaargekom om te kyk of die gedagte van ‘n herlaaivereniging lewensvatbaar is. Die onderliggende dryfvere was kortliks die volgende:
 
  		•  Onvoldoende data oor die herlaai van bepaalde kalibers met Somchem dryfmiddels, aangesien ingevoerde dryfmiddels bykans onverkrygbaar geword het.
     
  		•  Uiteenlopende herlaaipraktyke wat bedryf was, sonder ‘n forum waar kennis en ekspertise uitgeruil kon word.
     
  		•  Onrustigheid wat by indiwidue ontstaan het oor die voortbestaan van hul vryheid en voorreg (reg) om te mag/kan herlaai, sonder dat daar ‘n verteenwoordigende spreekbuis/belangegroep bestaan.
     
  		•  Die behoefte van indiwidue om hul gemeenskaplike belangstelling te deel en idees uit te ruil.
     
    Daar was onmiddellik geesdrif vir die idee, en is Org dan ook tydens die stigtingsvergadering op 22 Oktober 1997 tot die eerste voorsitter van die Herlaaivereniging van Suid Afrika verkies. Die bestuur het destyds uit Org as Voorsitter. Niel van Niekerk as Vise-Voorsitter, Mauritz Coetzee as Sekretaris, Hercules Louw as Tesourier en twee addisionele lede nl Peter Carr en Rouald Naudé bestaan. Gedurende 1998 is die Herlaaivereniging ingelyf by die SA Jagters en Wildbewaringsvereniging as ‘n Spesialis Tak met volwaardige takstatus. Belangstelling in herlaaitegnieke en praktyke kring egter baie wyer uit as die invloedsfeer van die SA Jagters en dit is gou besef dat die Herlaaivereniging sou moes herleef om ‘n ware nasionale kleur aan veral toeganklikheid te verleen. Op 1 September 2000 word die Herlaaivereniging weer as ‘n outonome vereniging ge-aktiveer, maar as ‘n spesialis belangegroep by die SA Jagters ge-affilieer. Op 1 April 2008 word die Herlaaivereniging nuwe forum ge-aktiveer en is tans besig met bestuur veranderings.
     
    Die doel van die Herlaaivereniging is om …”…’n Forum daar te stel vir die Opbou en die Uitbou van die Herlaaikuns”. Ter bereiking van die doel streef ons die volgende doelstellings na:
     
    1. Die uitbou en bevordering van die herlaaikuns deur die benutting van alle geleenthede wat binne die uitvoerbaarheid-vermoë van die organisasie is.
     
    2. Die bevordering van veilige herlaaipraktyke.
     
    3. Die daarstel van doktrines en standaarde vir die her/handlaai van ammunisie.
     
    4. Die ontwikkeling van ‘n nodale punt vir toegang tot data of kennis vir almal wat ‘n behoefte daarvoor het deur ‘n webwerf, ‘n nuusbrief, lys van kundiges oor bepaalde onderwerpe en ‘n uiteindelike databasis.
     
    5. Die beskerming van die voorreg om te herlaai.
     
    6. Die bedinging van ekonomiese voordele vir sy lede.
     
    Die Herlaaiers is redelik prominent sigbaar in wapen- en skietverwante aktiwiteite. Die Herlaaivereniging is trots op sy prestasies en glo dat ons ‘n bydrae lewer tot die verbetering van kennis oor die handlaai van ammunisie. Lede van die Bestuur word letterlik deur honderde indiwiduele navraers oor spesifieke kalibers se herlaaidata, of wenke/aanbevelings genader. Dit is vir ons lekker en ‘n vooorreg om van hulp te wees waar ons kan, en ons vergeet soms dat ons die Herlaaivereniging as ‘n stokperdjie in ons privaat tyd bedryf!
     
    Die Herlaaivereniging se ledetal groei so vinnig dat ons daaraan begin dink om vir praktiese redes te desentraliseer. Die gedagte is om te begin met die ontwikkeling van funksionele sateliet “takke” by Jagverenigings en ander vuurwapen verwante organisasies.